landslide : हिमाचलमध्ये भूस्खलन; भीषण दुर्घटनेत २ मृत्यू, ढिगाऱ्याखाली ५० हून अधिक जण अडकल्याची भीती

किन्नौर, हिमाचल प्रदेशः हिमाचल प्रदेशातील किन्नौरमध्ये भीषण दुर्घटना घडली आहे. भूस्खलनात अनेक गाड्या ढिगाऱ्याखाली दबल्या गेल्या आहेत. या घटनेत आतापर्यंत २ जणांचा मृत्यू झाला असून ५० हून अधिक जण ढिगाऱ्याखाली अडकल्याची भीती आहे. ही दुर्घटना हिमाचल प्रदेशातील किन्नौर जिल्ह्यातल्या रेकांग पियो-शिमला हायवेजवळ दुपारी १२.४५ घडली आहे. इथं भूस्खलनाची दुर्घटना घडली आहे. या भूस्खलनात एक ट्रक, एक सरकारी बस आणि इतर वाहनं दबल्याचं सांगण्यात येत आहे. मीडिया रिपोर्ट्सनुसार शिमल्याला जात असलेल्या एका बसमध्ये ४० प्रवासी होते. ही बस यात ढिगाऱ्याखाली अडकल्याचं बोललं जातंय. घटनास्थळी भारत-तिबेट सीमा पोलिसांकडून मदत आणि बचावकार्य सुरू आहे.

पोलिसा आणि प्रशासनाने बचावकार्याचा वेग वाढवावा. एनडीआरएफच्या टीमलाही अलर्ट करण्यात आलं आहे. एक बस आणि एक कार भूस्खलनात सापडल्याची माहिती आहे. या दुर्घटनेची सविस्तर माहिती अद्याप मिळालेली नाही, असं हिमाचल प्रदेशचे मुख्यमंत्री जयराम ठाकूर म्हणाले.

Jammu Kashmir : पृथ्वीवरचा स्वर्ग नकोसा, ‘नवकाश्मिरा’त केवळ दोघांचीच जमीनखरेदी

पंतप्रधान मोदींचा हिमाचलच्या मुख्यमंत्र्यांना फोन

या घटनेवरून पंतप्रधान मोदींनी ट्वीट केले आहे. हिमाचल प्रदेशचे मुख्यमंत्री जयराम ठाकूर यांच्याशी आपण किन्नौरमधील भूस्खलनाच्या घटनेसंबंधी फोनवरून बोललो आहोत. मदत आणि बचावकार्यात सर्व मदत केली जाईल, असं आश्वासन पंतप्रधान मोदींनी मुख्यमंत्र्याना दिलं आहे.

भूस्खलनाच्या घटनेचा भयावह व्हिडिओ समोर

केंद्रीय गृहमंत्री अमित शहा यांनीही ट्वीट करून माहिती दिली आहे. आयटीबीपीच्या अनेक टीमकडून मदत आणि बचावकार्य सुरू आहे. मुख्यमंत्री जयराम ठाकूर यांच्याशीही आपण बोललो आहे. तसंच आयटीबीपीच्या महारासंचलकांनीशीही बोलणं झालं आहे. मदत आणि बचावकार्य वेगाने करण्यात येत आहे. नागरिकांचे प्राण वाचवणं आणि जखमींना तातडीने उपचार देणं हे आयटीबीपी आणि स्थानिक प्रशासनाची प्राथमिकता आहे, अशी माहिती अमित शहा यांनी दिली आहे.