सोनाली कुलकर्णीचा लाइव्ह ‘तमाशा’, मराठी चित्रपटात होणार अनोखा प्रयोग

मुंबई– मराठी चित्रपटसृष्टीची अप्सरा म्हणवली जाणारी अभिनेत्री सोनाली कुलकर्णी लग्नानंतरचे सोनेरी दिवस अनुभवते आहे. काही दिवसांपूर्वीच ती पतीसोबत मालदीव येथे सुट्ट्यांचा आनंद घेत होती. सोनालीच्या फोटोंवर चाहत्यांनी लाइक आणि कमेंटचा अक्षरशः पाऊस पाडला. सोनाली आता कोणत्या चित्रपटात दिसणार याची प्रेक्षकांना प्रचंड उत्सुकता होती. नुकतीच सोनालीच्या नव्या चित्रपटाची घोषणा करण्यात आली आहे. प्लॅनेट मराठी आणि गोल्डन रेशो फिल्म्स यांची निर्मिती असलेल्या ‘तमाशा लाइव्ह’ या चित्रपटाचं पोस्टर प्रदर्शित करण्यात आलं आहे. चित्रपटाचं दिग्दर्शन संजय जाधव करत असून सोनाली चित्रपटात मुख्य अभिनेत्रीच्या भूमिकेत दिसणार आहे.

घर गेलं म्हणून रुपाली भोसलेवर आलेली गोठ्यात राहायची वेळ

‘तमाशा लाइव्ह’ बद्दल अधिक माहिती देताना संजय जाधव म्हणाले, ‘मराठीत असा प्रयोग पहिल्यांदाच होत आहे. या चित्रपटात एक दोन नाही तर तब्बल तीस गाणी असणार आहेत. त्यासाठी सोनाली आम्हाला योग्य वाटली. क्षितिज पटवर्धन याने गाण्यांचे बोल लिहिले असून अमितराजने ती संगीतबद्ध केली आहेत. तर नृत्य दिग्दर्शन उमेश जाधव याच आहे. एकंदरीतच ही संपूर्ण टीम एकदम भन्नाट आहे. सोनाली माझी खूप चांगली मैत्रीण आहे पण आम्ही पहिल्यांदाच एकत्र काम करत आहोत. या चित्रपटासाठी मी खूप उत्सुक आहे.’

या चित्रपटाची कथा मनीष कदम यांची असून पटकथा संजय जाधव यांची आहे. तर संवाद अरविंद जगताप यांचे आहेत. अक्षय बर्दापूरकर, अभयानंद सिंग आणि पियुष सिंग ‘तमाशा लाइव्ह’ चे निर्माता आहेत. संजय सध्या ‘अनुराधा’ चित्रपट करत आहेत तर सोनाली ‘हाकमारी’ मधून प्रेक्षकांच्या भेटीला येणार आहे. प्रदर्शित झालेल्या पोस्टरनुसार हा चित्रपट नोव्हेंबर २०२२ मध्ये प्रदर्शित होणार आहे. ‘तमाशा लाइव्ह’ संगीतमय चित्रपट असल्याने प्रेक्षकांचा त्याला कसा प्रतिसाद लाभतो हे पाहणं औसुक्याचं ठरेल. परंतु, पोस्टर पाहून प्रेक्षकांची चित्रपटाबद्दलची उत्सुकता वाढली आहे.

रात्रीस खेळ चाले ३- नाईकांच्या वाड्यात घुमणार अण्णांचा आवाज