सहदेव आणि बादशाहचं ‘बचपन का प्यार’ प्रदर्शित, काही तासांत पार केला लाखोंचा आकडा

मुंबई– शाळेत ‘बचपन का प्यार’ गाणं गाऊन सोशल मीडियावर प्रचंड लोकप्रिय झालेला सहदेव दिर्दो आणि बॉलिवूड रॅपर बादशाह यांचं नवं गाणं नुकतंच युट्यूबवर प्रदर्शित करण्यात आलं आहे. ‘बचपन का प्यार’ गाण्याची नेटकऱ्यांमध्ये इतकी लोकप्रियता आहे की प्रदर्शनाच्या काही तासांच्या आतच व्हिडीओला लाखों व्हिव्यू मिळाले आहेत. बादशाह आणि सहदेव यांच्या या गाण्याचं नावदेखील ‘बचपन का प्यार’ असंच ठेवण्यात आलं असून गाण्यात गायिका आस्था गिल आणि रिको देखील आहेत.

सहदेवचं ‘बचपन का प्यार’ सोशल मीडियावर इतकं लोकप्रिय झालं होतं की नेटकऱ्यांसह अनेक कलाकारांनीही या गाण्यावर रील्स बनवून चाहत्यांसोबत शेअर केले होते. सोशल मीडियावर हे गाणं ऐकून बादशाहने सहदेवसोबत गाणं बनविणार असल्याची घोषणा केली होती. त्यानंतर बादशाहने सहदेवला मुंबईला भेटायला बोलावलं होतं. आपला शब्द खरा करत बादशाहने सहदेवसोबतचं गाणं प्रदर्शित केलं आहे. व्हिडिओत सहदेव बादशाहसोबत नृत्य करताना दिसत आहे. तर गाण्यात बालपणापासून तरुणपणापर्यंतची प्रेमकहाणी दाखवण्यात आली आहे. हे गाणं बादशाहने त्याच्या ऑफिशिअल युट्यूब चॅनेलवर प्रदर्शित केलं आहे.

यासोबतच बादशहाने इन्स्टाग्रामवर सहदेवचा एक व्हिडीओ पोस्ट करत लिहिलं, ‘सहदेव जेव्हा तू मला भेटायला तुझ्या गावाहून मुंबईला आलास तेव्हा माझ्यासाठी एक भेट घेऊन आलास. सहदेवने दिलेली भेट माझ्या किमती भेटवस्तूंपैकी एक आहे. मी सहदेवच्या उज्ज्वल भविष्याची आशा करतो. मला विश्वास आहे की हे बचपन का प्यार जग कधीही विसरू शकणार नाही.’ असं म्हणत बादशाहने सहदेवचं कौतुक केलं आहे.

रंगकर्मी आंदोलन- इथे पाहा पूर्ण आणि अपूर्ण मागण्यांची यादी