सलमान खानच्या लाडक्या भावाचा संसार मोडला, २४ वर्षांनी विभक्त होणार सोहेल- सीमा

मुंबई- बॉलिवूड अभिनेता सोहेल खानने पत्नी सीमा खानपासून घटस्फोट घेण्याचा निर्णय घेतला आहे. दोघेही आज (१३ मे) कौटुंबिक न्यायालयाबाहेर दिसले. २४ वर्षांनंतर त्यांचं नातं संपुष्टात येत आहे. दोघांना निर्वाण आणि योहान ही दोन मुलं आहेत. असं सांगितलं जात आहे की दोघेही बरेच दिवस वेगळे राहत होते. घटस्फोटासाठी सोहेल खान आणि सीमा सचदेव कौटुंबिक न्यायालयात दाखल झाले होते. दोघांचे फोटो सोशल मीडियावर व्हायरल होत आहेत. ही बातमी बॉलिवूड आणि खान कुटुंबासाठी धक्कादायक आहे.

१९९८ मध्ये प्रेमविवाह केला होता

सोहेल आणि सीमा यांचा प्रेमविवाह झाला होता. दोघांची प्रेमकहाणी एखाद्या सिनेमाच्या कथेपेक्षा कमी नाही. सीमा ही मुळची दिल्लीची आहे. फॅशन जगतात नाव कमवण्यासाठी ती मुंबईत आली होती. रिपोर्टनुसार, दोघांची पहिली भेट चंकी पांडेच्या साखरपुड्याच्या पार्टीमध्ये झाली होती. सोहेल पहिल्या नजरेतच सीमाच्या प्रेमात पडला होता. यानंतर दोघांचं प्रेम घट्ट झालं आणि दोघांनी लग्न करण्याचा निर्णय घेतला.

मध्यरात्री केलं लग्न

धर्म वेगवेगळे असल्यामुळे सोहेल आणि सीमा यांच्या लग्नात अनेक अडचणी आल्या. यामुळे मध्यरात्री मौलवीला बोलावण्यात आले आणि रात्रीच त्यांनी निकाह केला होता. त्यानंतर दोघांनी आर्य समाज मंदिरात दुसरं लग्न केलं.

सीमाचे आई-वडील लग्नाच्या विरोधात होते

सीमाच्या आई-वडिलांचा या लग्नाला विरोध होता. धर्म वेगवेगळे असल्यांमुळे त्यांनी लग्नाला स्पष्ट नकार दिला होता. हिंदू आणि मुस्लिम असं लग्न होऊ नये असं त्यांना वाटत होतं. मात्र, सोहेल आणि सीमा एकमेकांच्या प्रेमात आकंठ बुडाले होते त्यामुळे त्यांनी समाजाची पर्वा न करता पळून जाऊन लग्न केलं.