रक्तरंजित अफगाणिस्तान; २४ हजार तालिबानी आणि ५००० नागरिकांचा मृत्यू

काबूल: अफगाणिस्तानमध्ये मागील काही महिन्यांपासून रक्तरंजित संघर्ष सुरू आहे. अमेरिकन सैन्य माघारी जाणार असल्याच्या घोषणेनंतर हिंसाचाराच्या घटनांमध्ये वाढ झाली आहे. तालिबानी दहशतवाद्यांकडून मागील काही महिन्यांपासून जोरदार हल्ले सुरू आहेत. मागील चार महिन्यात पाच हजार नागरिकांचा मृत्यू झाला आहे. तर, अफगाण सुरक्षा दलाच्या कारवाईत जवळपास २४ हजार तालिबानी दहशतवाद्यांचा खात्मा करण्यात आला आहे. अफगाणिस्तान सरकारने ही माहिती दिली.

अफगाणिस्तान सरकारच्या शांतता प्रक्रियेबाबतच्या खात्याच्या अखत्यारीत असलेल्या हिंसाचार पाहणी विभागाने म्हटले की, देशात मागील चार महिन्यात झालेल्या संघर्षात २४ हजार तालिबानी आणि पाच हजार नागरिकांनी प्राण गमावले आहेत. प्रसिद्ध केलेल्या आकडेवारीनुसार, एप्रिल ते जुलै या कालावधीत तालिबानने अफगाणिस्तानमधील विविध भागांमध्ये २२ हजार हल्ले केले. त्याच्या परिणामी २४ हजार तालिबानी ठार झाले तर हजारो जखमी झाले.

वाचा:अफगाणिस्तान: संयु्क्त राष्ट्र संघाच्या मुख्यालयावर हल्ला; एक ठार

अधिकारी सय्यद अब्दुला हाश्मी यांनी सांगितले की, हिंसाचार घडवण्यासाठी जवळपास १० हजारांहून अधिकजणांनी अफगाणिस्तानमध्ये प्रवेश केला. यामागे परकीय शक्तींचा हात असल्याचा आरोपही त्यांनी केला.

वाचा:खळबळजनक दावा! ‘या’ कारणांमुळे तालिबानकडून भारतीय पत्रकाराची हत्या

मागील काही दिवसांमध्ये तालिबानने आक्रमक भूमिका घेतली असून अफगाणिस्तानमधील बहुतांशी भागावर नियंत्रण मिळवले आहे. अफगाण सुरक्षा दलासोबत तालिबानच्या चकमकी घडत आहेत.

काबूल: तालिबानने केली विनोदी अभिनेत्याची हत्या; व्हिडिओ व्हायरल

दरम्यान, जाबूल प्रांतात मोटार्रने केलेल्या हल्ल्यात पाच नागरिकांचा मृत्यू झाला. तर, १२ जण ठार झाले असल्याची माहिती आरोग्य अधिकाऱ्यांनी दिली. गुरुवारी संध्याकाळी कलातजवळ अफगाण सुरक्षा दल आणि तालिबान दरम्यान संघर्ष झाला. या चकमकीदरम्यान मोटार्र घरावर पडल्याने किमान पाच जण ठार झाले. यामध्ये महिला आणि मुलांचाही समावेश आहे. या घटनेत १२ जण जखमी झाले. जखमीपैकी काहींची प्रकृती गंभीर आहे.