नीरज चोप्रासाठी ट्वीट करून अमिताभ झाले ट्रोल, युझर्स म्हणाले- ‘चुका सुधारण्यातच आयुष्य जाणार’

मुंबई : बॉलिवूडचे महानायक अमिताभ बच्चन हे सोशल मीडियावर सक्रीय असतात. आपल्या चाहत्यांसाठी ते वेगवेगळ्या पोस्ट शेअर करत असतात, तसेच ते सोशल मीडियावरून संवादही साधत असतात. परंतु अनेकदा बिग बींना पोस्टमधून चुकीच्या गोष्टी, आकडेवारी शेअर केल्याने ट्रोल व्हावे लागते. आतादेखील असेच काहीसे झाले. अमिताभ बच्चन यांनी टोकिओ ऑलिम्पिकमध्ये सुवर्ण पदक मिळवलेल्या नीरज चोप्राचे कौतुक करणारे एक ट्वीट केले आहे. या ट्वीटमुळे बिग बींना ट्रोल करण्यात आले आहे.

अमिताभ बच्चन यांनी काय केले होते ट्वीट

अमिताभ बच्चन यांनी एक अॅनिमेटेड व्हिडिओ आपल्या ट्वीटमध्ये शेअर केला होता. हा व्हिडिओ शेअर करत त्यांनी भारतीय ऑलिम्पिक टीमचे कौतुक केले होते. त्यांनी लिहिले की, ‘एका व्यक्तीच्या छातीने १०३ कोटी लोकांची छाती अभिमानाने फुलवली आहे. भारतीय ऑलिम्पिक टीमने जगामध्ये देशाचा झेंडा फडकवला आहे.’

अमिताभ बच्चन यांनी या ट्वीटमध्ये भारताची लोकसंख्या १३० कोटी ऐवजी १०३ कोटी लिहिली. यावरून युझर्सनी त्यांना ट्रोल करायला सुरुवात केली आहे. एका युझर्सने लिहिले की, ‘यांचे अर्धे आयुष्य चुका सुधारण्यातच जाणार आहे.’ अन्य एका युझरने लिहिले, ‘१०३ कोटी?? हे ज्ञान तुम्हाला कोणत्या विद्यापीठामध्ये मिळाले आहे. अंधभक्तीमध्ये २७ कोटी जनतेला तुम्ही नायजेरियाला पाठवून दिले.’

अन्य एका युझरने लिहिले आहे की, ‘१४२ कोटी लोकसंख्या आहे देशाची… २०११ मध्ये झालेल्या जनगणेच्या आकडेवारीमध्ये वाढणारी लोकसंख्या मिळवा.’ आणखी एका युझरने लिहिले, ‘ सर तुम्हाला देशाबद्दल इतके प्रेम असेल तर सुशांतसिंह राजापूत केसमध्ये पुढे येऊन बोला की…’

अमिताभ बच्चन यांनी चूक सुधारली

सोशल मीडियावर ट्रोल झाल्यानंतर अमिताभ बच्चन यांनी आपली चूक सुधारली. ही चूक सुधारण्यासाठी त्यांनी आणखी एक ट्वीट केले. त्यामध्ये त्यांनी लिहिले, ‘चूक सुधारली १३० कोटी’

अमिताभ बच्चन यांच्या कामाबद्दल सांगायचे तर आयुष्मान खुरानासोबत ते ‘गुलाबो सिताबो’ या सिनेमात दिसले होते. बिग बींच्या आगामी सिनेमांमध्ये चेहरे, झुंड, मेडे लवकरच प्रदर्शित होतील. तसेच रणबीर कपूर आणि आलिया भट्ट सोबतचा ब्रह्मास्त्र सिनेमातही ते दिसणार आहेत. सध्या अमिताभ बच्चन ‘गुडबाय’ सिनेमाच्या चित्रीकरणामध्ये व्यग्र आहेत. या सिनेमात त्यांच्यासोबत रश्मिका मंदाना आणि नीना गुप्ता दिसणार आहेत. त्याशिवाय ते दीपिका पादुकोणसोबत हॉलिवूड फिल्म ‘द इंटर्न’च्या हिंदी रिमेकमध्येही दिसणार आहेत.