कोण होणार करोडपतीमध्ये खेळणार मनोज बाजपेयी, सयाजी शिंदेंची मिळणार साथ

मुंबई- कोण होणार करोडपतीमध्ये दर शनिवारी कर्मवीरच्या भागामध्ये विशेष अतिथी येऊन सामाजातल्या गरजू घटकांसाठी खेळतात व जिंकलेली रक्कम त्यांना मदत म्हणून देऊ करतात. या पुढील भागात बॉलिवूडचे दोन हरहुन्नरी अभिनेते मनोज बाजपेयी आणि सयाजी शिंदे कर्मवीर भागात येणार आहेत. दोघंही साताऱ्यातील सह्याद्री देवराई सामाजिक संस्थेसाठी खेळणार आहेत.

सयाजी शिंदे हे मराठी, हिंदी, दाक्षिणात्य आणि नाट्यसृष्टीतलं नावाजलेलं व्यक्तिमत्त्व आहे. फक्त आपल्या अभिनयासाठी नाही तर आपल्या समाजसेवेसाठीसुद्धा त्यांना ओळखलं जातं. त्यांनी आत्तापर्यंत अनेक समाजपयोगी कामं केली आहेत. तर दुसरीकडे मनोज बाजपेयी यांनी आपल्या दर्जेदार अभियानयाच्या जोरावर चित्रपटसृष्टीत नाव कमावलं आहे. अनेक उत्तमोत्तम कलाकृती त्यांनी प्रेक्षकांना दिल्या आहेत आणि ते अजूनही देत आहेत.

मनोज बाजपेयी आणि सयाजी शिंदे हे गेली बरीच वर्ष एकमेकांचे मित्र आहेत. त्यांनी शूल चित्रपटात एकत्र काम केलं होतं. या चित्रपटा दरम्यानच्या आठवणींना त्यांनी यावेळी उजाळा दिला. याशिवाय मनोज बाजपेयी हे हरिवंशराय बच्चन यांचे चाहते आहेत. कोण होणार करोडपतीच्या सेटवर मनोज यांनी हरिवंशराय बच्चन यांची कविताही सादर केली.

मनोज बाजपेयी यांनी सचिन खेडेकर मालिका करत असताना सचिनजींच्या अभिनयातले बारकावे पहिले आणि ते त्यांनी त्यांच्या आगामी चित्रपटात त्यांनी कसे वापरले, हेही सांगितलं आहे. पाहा, ‘कोण होणार करोडपती’ – कर्मवीर विशेष, १४ ऑगस्ट, रात्री ९ वाजता फक्त सोनी मराठी वाहिनीवर.