करोना, इबोलासारखा आणखी एक घातक विषाणू; WHO ने दिली माहिती

जिनेव्हा: करोना महासाथीचा आजार सुरू असताना आणखी एक घातक विषाणू आढळला आहे. करोना, इबोला सारखा घातक असणारा मारबर्ग हा विषाणू आढळला असल्याची माहिती जागतिक आरोग्य संघटनेने दिली. पश्चिम आफ्रिकन देश गिनी मध्ये हा विषाणू आढळला. वटवाघूळ या विषाणूचा वाहक असल्याची माहिती जागतिक आरोग्य संघटनेने दिली आहे.

जागतिक आरोग्य संघटनेने दिलेल्या माहितीनुसार, गिनी देशातील दक्षिण भागातील गुकेगूमध्ये दोन ऑगस्ट रोजी एका रुग्णाचा मृत्यू झाला. मृत्यूनंतर घेण्यात आलेल्या नमुन्यामध्ये या मारबर्ग विषाणूची पुष्टी झाली. मारबर्ग हा इबोला, करोनासारखाच विषाणू आहे. पशूंद्वारे माणसाला या विषाणूची लागण होते. करोना विषाणूप्रमाणेच हा मारबर्ग विषाणूचा वाहक वटवाघूळ आहे. या विषाणूची लागण झाल्यास मृत्यूचा धोका हा २४ ते ८८ टक्के इतका आहे. गिनी सरकारनेदेखील हा विषाणू आढळला असल्याच्या वृत्ताला दुजोरा दिला आहे.

‘या’ देशात करोनाचा हाहाकार; दर दोन मिनिटाला एकाचा मृत्यू
जागतिक आरोग्य संघटनेने म्हटले की, मारबर्ग विषाणूचा फैलाव राष्ट्रीय आणि स्थानिक पातळीवर होण्याचा धोका अधिक असू शकतो. मात्र, आंतरराष्ट्रीय पातळीवर हा संसर्ग फैलावण्याबाबत कोणतेही संकेत नाहीत. विषाणूचा फैलाव होऊ नये यासाठी गिनीमध्ये इबोला विषाणूला अटकाव करणाऱ्या आरोग्य विभागाच्या एका पथकाला जबाबदारी देण्यात आली आहे.

फ्रूट बॅट (वटवाघळाची प्रजाती) या विषाणूचा वाहक आहे. या वटवाघळांमध्ये हा विषाणू मोठ्या कालावधीपर्यंत जिवंत राहू शकतो. त्यांच्या माध्यमातून या विषाणूची लागण माणसांपर्यंत होते. हा विषाणू पहिल्यांदा १९६७ मध्ये जर्मनीतील मारबर्ग येथे आढळला होता.

करोनानंतर चीनमध्ये ‘या’ आजाराचा धोका; रुग्ण आढळल्याने चिंता वाढली
लक्षणे काय?

गिनीमध्ये मारबर्ग बाधित व्यक्तीला अचानकपणे ताप येणे, डोके दुखी, स्नायूंमध्ये वेदना जाणवणे, शरिरातील कोणत्याही भागातून रक्त येणे, उलटीमध्ये रक्त येणे आदी त्रास जाणवला असल्याची माहिती जागतिक आरोग्य संघटनेने दिली.

उपचार काय?

जागतिक आरोग्य संघटनेने सांगितले की, करोना प्रमाणेच मारबर्गच्या आजारावर उपचार नाहीत. मात्र, बाधिताला आढळून आलेल्या लक्षणांवर उपचार करता येऊ शकतात. जेणेकरून त्याचा त्रास कमी होईल. आतापर्यंत ठोस औषधे, इंजेक्शन उपलब्ध झाली नसल्याचे त्यांनी सांगितले.