करोनाचा उगम चिनी प्रयोगशाळेतूनच; माणसांना बाधा होण्यासाठी विषाणूत बदल: अहवाल

वॉशिंग्टन: मानवाला बाधा व्हावी यासाठी चीनमधील शास्त्रज्ञ करोना विषाणूंत बदल करण्याचे काम करीत असल्याचा गंभीर आरोप अमेरिकेच्या रिपब्लिकन पक्षाच्या अहवालात करण्यात आला आहे. ‘कोविड १९’ साथरोगाला कारणीभूत ठरलेला हा विषाणू चीनमधील प्रयोगशाळेतून बाहेर पडल्याचा दावाही अहवालात करण्यात आला आहे. सोमवारी हा अहवाल जाहीर करण्यात आला.

करोना विषाणूचा उगम कोठे झाला याबाबत अमेरिकी गुप्तहेर यंत्रणाही तपास करीत आहेत. विषाणूचा उगम चिनी प्रयोगशाळेतून झाल्याच्या निष्कर्षापर्यंत अद्याप तपास यंत्रणा पोहोचलेल्या नाहीत. मात्र, अमेरिकी संसदेच्या परराष्ट्र व्यवहार समितीमधील रिपब्लिकन पक्षाचे ज्येष्ठ सदस्य माइक मॅककॉल यांनी याबाबत अहवाल जाहीर केला आहे. चीनमधील ‘वुहान इन्स्टिट्यूट ऑफ व्हायरोलॉजी’मधील (डब्ल्यूआयव्ही) शास्त्रज्ञ मानवाला लागण व्हावी यासाठी करोना विषाणूत बदल करण्यावर संशोधन करीत असल्याचे पुरेसे पुरावे उपलब्ध असल्याचे या अहवालात म्हटले आहे.

वाचा:करोनाचा विषाणू आणखी घातक होण्याआधी नियंत्रण मिळवा; WHO चा इशारा

चिनी आणि अमेरिकी सरकारच्या निधीतून हे संशोधन होत असल्याचा दावाही यात करण्यात आला आहे. करोना साथरोगाच्या उगमाचा शोध घेण्यासाठी द्विपक्षीय तपास करण्याची गरज असल्याचेही या अहवालात म्हटले आहे.

वाचा:चीनमध्ये करोनाची नवी लाट?; बीजिंगसह १५ शहरात ‘डेल्टा’चा संसर्ग

वुहानमधील प्रयोगशाळेतून करोनाचा प्रसार झाल्याचा दावा चीनने यापूर्वी फेटाळून लावला आहे. करोनचा पहिला रुग्ण २०१९मध्ये वुहान शहरातच सापडला होता. त्या वेळी चीनने ही साथ लपवल्याचा आरोप झाले होते. वुहानमधील मासेबाजारातून करोना विषाणू पसरल्याचा दावाही यापूर्वी करण्यात आला आहे. डोनाल्ड ट्रम्प अमेरिकेचे राष्ट्राध्यक्ष असताना त्यांनी चीनवर सातत्याने आरोप केले होते. त्यामुळे चीन आणि अमेरिकेतील तणाव आणखीच वाढला होता.