अफगाणिस्तानमधील ‘या’ भागातील भारतीयांना मायदेशी परतण्याचे आदेश

काबूल: अफगाणिस्तानमधील परिस्थिती दिवसेंदिवस बिघडत आहे. तालिबानची सरशी होत असून अफगाण सैन्याची पिछेहाट होत आहे. अफगाणिस्तानमधील ही परिस्थिती पाहून भारत सरकारने मजार-ए-शरीफमधील वाणिज्य दूतावासातील भारतीय कर्मचाऱ्यांना तातडीने मायदेशी परतण्याचे आदेश दिले आहेत. मंगळवारी संध्याकाळी एक विशेष विमान भारताकडे रवाना होणार आहे.

अफगाणिस्तानमध्ये परिस्थिती बिघडत आहे. तालिबानी बंडखोरांनी अफगाणिस्तानमधील बहुतांशी भागावर नियंत्रण मिळवले आहे. मागील काही दिवसांमध्ये तालिबान अधिक आक्रमक झाले आहे. त्यांनी पाच राज्यांच्या राजधानींचा ताबा घेतल्याचे वृत्त आहे. त्यामुळेच भारताने आपल्या कर्मचाऱ्यांची सुरक्षिता लक्षात घेऊन त्यांना अफगाणिस्तान सोडण्याचे आदेश दिले आहेत.

अफगाण सैन्याची आणखी पिछेहाट; कुंदूज शहरावर तालिबानींचा कब्जा
मजार-ए-शरीफमधील भारतीय दूतावासाने दिलेल्या माहितीनुसार, मंगळवारी संध्याकाळी मजार-ए-शरीफमधून एक विशेष विमान नवी दिल्लीसाठी रवाना करण्यात येणार आहे. त्यामुळे या भागात असणाऱ्या भारतीयांनी तातडीने संध्याकाळच्या विमानाने नवी दिल्लीसाठी रवाना होण्याचे आवाहन दूतावासाने केले आहे.

या विमानाने मायदेशी जाणाऱ्या भारतीयांनी आपले नाव, पासपोर्ट क्रमांक आणि अन्य माहिती व्हॉट्स अॅपवर देण्याची सूचना करण्यात आली आहे. ही माहिती ०७८५८९१३०३, ०७८५८९१३०१ या क्रमांकावर पाठवण्याचे आवाहन करण्यात आले आहे.

भारताने बांधलेल्या धरणावर तालिबानी हल्ला करायला आले आणि…
तालिबानने अफगाणिस्तानवर निर्णायक पकड घेतल्यास भारतीयांच्या जीवाला धोका संभावण्याची शक्यता आहे. त्यामुळेचे भारताकडून सतर्कता बााळगली जात आहे.